Mange spel å velje i denne sommaren

Etter fleire somrar med koronarestriksjonar, kan dei mange tradisjonsrike spela rundt om i landet atter blomstre. Premierane står i kø.

På Nordmøre og i Romsdal kjem det no fire spel på rekke og rad. Det startar 22. juni med premiere på Lady Arbuthnott - frua på Elverhøy i Sunndal. Etter utandørsforestillingane på Leikvin i fjor, er frua i år tilbake i Hovshall. Det blir vist heile tolv forestillingar i tida fram til og med 2. juli.

Lady Arbuthnott - frua på Elverhøy vart første gong oppført i Sunndal kulturhus i 1996, og er landets lengstlevande musikkspel. Stykket bygger på ei historie om ei sterk og merkverdig dame, som første gong kom til Sunndal i 1866. Det enda med at ho vart der livet ut. Opphavsmenn til spelet er Stig Nilsson (tekst) og Lars Ramsøy-Halle (musikk).

Fru Guri av Edøy på Smøla har premiere 14. juli. Stykket er skrive av Peggy Kristin Kruse, og vart første gong framført i 1990. Sidan 2009 har Fru Guri av Edøy vore framført ved det imponerande Gurisentret på Edøya. Handlinga er lagt til 1190, og er basert på ei blanding av fiksjon og faktiske historiske hendingar.

Spelet blir vist gonger i tidsrommet 14. - 17. juli.

Atlanterhavsspelet blir i år sett opp for andre gong i Bud, med premiere 28. juli. Handlinga i Atlanterhavsspelet er henta ut frå kystkulturarven vår, og omhandlar det strevsame kystlivet på midten av 1800-talet. Det er ei sterk og dramatisk historie, som også er krydra med mykje god humor.

Kystfortet i Bud skapar ei storslått ramme rundt spelet. Frå det fem meter høge amfiet kan publikum følge handlinga, med skjergarden utanfor Bud og det store, blå havet som kulisser. Det blir sju forestillingar i tidsrommet 28. juli - 6. august.

11. - 13. august er det klart for urpremiere på nyskapningen Spelet om Mardøla, som tek utgangspunkt i den historiske aksjonen for å berge Mardølafossen i 1970. Dette var ein av dei første miljøaksjonane i verda som tok i bruk sivil ulydigheit. Derfor vekte den også oppsikt både i Norge og internasjonalt. Spelet om Mardøla er skrive av Svein Sæter (tekst) og Lars Ramsøy-Halle (musikk).

Arenaen er lagt til Mardalsbøen i Eikesdal, med fossen som bakteppe. Det blir tre forestillingar, 11, 12. og 13. august.

For den som vil bruke sommaren til å skaffe seg litt kulturelt påfyll, er det altså mykje å glede seg til. Oversikt over fleire spel finn du her.