Atlanterhavsvegen er vel verdt eit besøk, uansett kva tid på året det måtte vere. Sol, regn, snø eller storm - det spelar ingen rolle. Det skiftande lyset i den mektige naturen gjer alltid inntrykk.
No på sommaren er det folksamt her ute. Vi tok ein tur på ein heller grå 31. august, og fekk så vidt parkert bilen i mylderet på Eldhusøya. Storparten av turistane er framleis norske, men vi kunne også registrere utanlandske bilskilt og framande tungemål.
Atlanterhavsvegen vart opna i 1989, etter ei byggetid på seks år. Trafikkmengda, som skulle kome til å overgå alle prognosar, gjorde at at bompengane forsvann allereie i 1999.
I dag er Atlanterhavsvegen ein av dei største turistattraksjonane i landet. I september 2005 vart vegen kåra til Århundrets byggverk 1905-2005 i Møre og Romsdal. Den har også vorte kåra til verdas finaste bilveg av den britiske avisa The Guardian.
Opprinnleg var Atlanterhavsvegen definert som vegstykket mellom Vevang og Kårvåg. Seinare vart turistvegen utvida, slik at Atlanterhavsvegen i dag går mellom Bud og Kårvåg.
Les meir om Atlanterhavsvegen her.